Nais ipaalam ng Philippine Consulate General sa Hong Kong SAR ang nakababahalang situwasyon sa kasalukuyan na dalawampu’t dalawang (22) Pilipino na ang nasasangkot sa krimeng pagpuslit ng illegal na droga (drug smuggling o trafficking) dito sa Hong Kong.

 Ang mga nasabing Pilipino ay nahuling may bitbit o may dalang ipinagbabawal na gamot gaya ng shabu, heroine o cocaine na nakatahi sa mga gilid ng maleta, o nakatago sa libro at butones ng damit, o sa tiyan at maseselang parte ng katawan ng mga kababaihan.   Ang mga Pilipinong ito ay kasalukuyang nakapiit sa iba’t ibang piitan dito sa Hong Kong. May nasentensiyahan na ng labing anim na taon (16 years) at walong taong (8 years) pagkakabilanggo. Ang iba pang mga Pilipino na nahaharap sa kasong drug trafficking ay kasalukuyang linilitis pa sa korte.

Base sa inpormasyon na ibinigay ng pamahalaan ng Hong Kong, ang mga Pilipinong nahuli na nagpuslit ng ipinagbabawal na gamot ay nagmula pa sa mga bansang Brazil, Thailand, Pakistan, India, Nigeria, Vietnam, Philippines at Malaysia. Ang mga ipinagbabawal na gamot na ito ay patungong China at ginamit lang ang Hong Kong na“transit point”.

Sa pagsisiyasat ng Konsulado sa mga naturang Pilipino, napag-alaman na ang mga ito ay biktima ng panloloko ng mga dayuhang kadalasang kasabwat din ng mga Pilipino na nagkukunwaring tutulong para magtrabaho sila sa ibang bansa.  Hinihimok sila ng kanilang amo o kakilala, gamit ang iba’t ibang pamamaraan ng panlilinlang, sang-ayon man o lingid sa kanilang kaalaman, kapalit ng halaga mula US$300 hanggang US$2,000.  Ayon sa ulat ng mga nahuling Pilipino, ang pasimuno o utak ng krimeng ito ay kalimitang mga taga Africa.

Dahil sa mga bagong teknolohiya sa paliparan ng Hong Kong, ang nasabing mga droga ay hindi maaaring maikubli sa mga may kapangyarihan.  Ito ay nasasala at ang mga sangkot ay nahuhuli at pinapatawan ng angkop na kaparusahan.  Ayon sa Ordinansa ng Hong Kong ukol sa pagpupuslit ng illegal na droga, Cap. 134, Sec. 4 ng Dangerous Drugs Ordinance ng Hong Kong, ang sinumang  mahulihan ng illegal na droga ay maaaring makulong ng hanggang dalawampu’t apat na taon (24 years).

Dahil dito, ibig payuhan ng Konsulado ang lahat na mga Pilipino na nagbabalak pumuntang Hong Kong, ito man ay pinal na destinasyon o transit lamang, na pag-ibayuhin ang pag-iingat at huwag masangkot sa nasabing krimen.

Kung mayroon kayong dagdag na katanungan hingil sa nasabing balita, mag-text sa numero bilang (+852) 9155-4023 o tumawag sa telepono bilang (852) 2823-8510 o 2823 -8505 o magpadala ng email sa hongkongpc@philcongen-hk.com.